.:Nova Fronteira:.

Desta volta decídome a presentarvos unha novela en galego, para introducirnos un pouco no panorama actual tan prometedor que está vivindo a nosa literatura. O nome de Rosa Aneiros aínda non é moi coñecido, pero o certo é que a súa mestría para a narrativa xa está traspasando fronteira.

En concreto, Resistencia atópase entre o mellor da súa producción. A novela transpórtanos até o Portugal de primeiros do século vinte, para ir relatando a historia de dúas familias portuguesas ó longo de todo o século, centrándose especialmente nas figuras de Filipa e Dinís, dous namorados que verán as súas vidas marcadas pola ditadura primeiro e pola revolución despois.

A pesares do que poda parecer, a obra no seu transcurso foxe de todos cantos estereotipos hai, presentando a historia de amor dende un punto de vista lonxano ó pastel habitual, anque mantendo en todo momento unha perspectiva poética e intimista, que afonda nos sentimentos das dúas personaxes principais e nos mostra como lles afectan os acontecementos que os arrodean.

Ademais, non deixa de botar unha ollada interesante á evolución social de Portugal ó longo do século pasado, mostrando os feitos máis importantes que viviron os seus habitantes dende a perspectiva das personaxes, aproveitando as descricións para plasmar costumes e modos de vivir.

De certo que non é unha lectura rápida, porque o estilo está moi coidado e busca a poesía da linguaxe en todo o que expresa, pero a historia atrapa ó pouco de comezar e anima constantemente a seguir ó longo das case catrocentas páxinas das que consta.

Concluíndo, é unha lectura para saborear despacio e con paciencia, pero que atrapa rápido e sen dúbida merece a pena.

Resistencia, de Rosa Aneiros. Publicada por Xerais en galego.